پاکستان کرکٹ بورڈ( پی سی بی) نے پاکستان اور نیوزی لینڈ کے درمیان 2سے 6جنوری تک نیشنل اسٹیڈیم کراچی ( نیشنل بینک کرکٹ ایرینا) میں کھیلے جانے والے دوسرے ٹیسٹ میچ میں تماشائیوں کے لیے مفت داخلہ کا اعلان کیا ہے۔ پی سی بی کے مطابق شائقین کو اسٹیڈیم میں داخل ہونے کے لیے صرف اپنا اصل شناختی کارڈ یا بی فارم دکھانا ہوگا
اور وہ کسی بھی پریمیم (عمران خان، قائد، وسیم اکرم اور ظہیر عباس)، فرسٹ کلاس (آصف اقبال، وقار حسن اور ماجد خان )اور جنرل انکلوژرز (محمد برادران اور انتخاب عالم) سے بلا معاوضہ میچ دیکھ سکیں گے۔غریب نواز پارکنگ ایریا سے شائقین کی اسٹیڈیم تک رسائی میں آسانی کے لیے شٹل بھی چلائی جائیں گی۔
اسٹیڈیم میں کوئی بھی آتشیں اسلحہ، کھلونا بندوقیں، وووزیلا، دھماکہ خیز مواد، پٹاخے، سگریٹ، ماچس، لائٹر، چاقو اور کوئی بھی تیز دھار چیز لانا ممنوع ہے۔اسٹیڈیم میں کھانے پینے کی اشیا، شیشہ/پلاسٹک کی بوتلیں، پاکستانی پرچم اور نیوزی لینڈ کے جھنڈے کے علاوہ کسی بھی جھنڈے کی اجازت نہیں ہے۔
ٹکٹ کا اجرا منتظمین کی شرائط و ضوابط سے مشروط ہے، جو www.bookme.pk مخصوص مقامات پر دستیاب ہیں۔ تمام افراد بشمول 4سال سے زیادہ عمر کے بچوں کے پاس اسٹیڈیم میں داخل ہونے اور میچ کے دوران انکلوژر کے اندر بیٹھنے کے لیے اپنا الگ اور اصل شناختی کارڈ/ب۔فارم اور ٹکٹ ہونا ضروری ہے۔
